TURA: ‘Ha Rynsan Meghalaya Rising Star’ ingipa git ring·susaani program-ko ong·atanio, result sheet-rangko kal·ake uko gittamgipa biaposa ong·ataha ine Tura-oni saksa Nasa Rianchi Ch Marak, ia program-ko ong·atgipa BC Entertainment-ni kosako Shillong songjinmani Sadar Police Station-o FIR ka·doangaha.
Nasa Rianchi-ni FIR-o parakani gitade, ia program-ko ong·atgipa manderang, uni kosako kragijagipa kamrangko ka·e uni man·gni biapko on·jahachim.
Ia program-o vote-rangko salna miksonge on·gipa coupon-rangkoba uko palchina gita uko draaha aro uni FIR ka·na aganon, ia program-ko ong·atgipa manderang somoi ra·chae uni FIR ka·aniko ru·utataha ineba ua FIR-o parakaha.
Nasa Rianchi-ni parakatani gitade, ia program-ni gadang bongaon ua susae final-o susana gita seokako man·ahachim aro ia final-ko re·anggipa July 11 tariko Shillong-o ong·atahachim. Final-o judge-rangoni saksa uni scoresheet-ko kal·akaha ine aganahani gimin ua scoresheet-ko am·on, ua scoresheet kinggnikosan judge-rangoniko man·aiaha indiba gittamgipa scoresheet-kode ua man·jaha aro ia gittamgipa scoresheet-ko organiser-rang una on·na jechakaha ine Nasa parakataha.
Iani bidingo talataniko on·china aro gital dake result-rangko parakchina gitaba ua organiser-rangko mol·molahachim indiba uamang iako dakjaha aro scoresheet-ko nisusaon ia susaanio 1st Runners Up ong·gipa mandenan uni score batachim ine ma·sina man·aha ineba Nasa parakataha.
Iani bidingo ua saksa Comet Lyngdoh minggipa mandekoba matnange FIR-o janapataha.
Indake ong·engon, ia apsan susaani program-o bakko ra·gipa Shillong-ni sakgipin Andriana Kharsyiemlong minggipa mandeba ia program-ko ong·atgipa dolni kosako police-rangna FIR ka·doangaha ine kobor on·aha.