SHILLONG: HNLC bobil dolni gitcham general secretary Cheristerfield Thangkhiew-ko police-rangni so·ote galgipani bidingo inquiry dakani report-ko manderang knana nangniktokengahani gimin ia report-ko ta·raken jinmana parakchina gita Meghalaya Pradesh Trinamool Congress (MPTC), a·dok sorkario dabiangaha.
“Ia a·selni bidingo inquiry dakani report-ko manderang nangniktokengani gimin ia kamko mongsonggipa ong·e ra·china anga didienga. Ia a·selni bidingo manderang sorokrango re·jome jingjengatanirangko dakahani gimin manderangni nangnikaniko knachakna nangchongmota,” ine Opposition dolni Chief Whip George B Lyngdoh parakataha.
So·ota man·gipa mandeni nokdangba ia a·selni report-ko knana nangnikengani gimin sorkari, manderangni nangnikaniko knachakna nanga ineba Lyngdoh aganaha.
Ia report-ko ta·rake parakchina dabienggipani bidingo janapatengon, so·ota man·gipa mandeni nokdang, an·tangtangni ka·sagiminko gimaatna nange duk mikchirangko chakna nangahani gimin sorkari, ia dabianiko knachakna nangchongmota ine MPTC-ni MLA parakataha.
“Uni gimin sawamancha dos donga uko ma·sina aro niam gita ja·kurangko de·na man·na gita ia report-ko manderangna parakaniara sorkarini daito ong·enga,” ine ua aganaha.
HNLC bobil dolni gitcham general secretary Cheristerfield Thangkhiew-ko police-rangni so·otgalgipani bidingo Justice (Retd) T Vaiphei-ni judicial inquiry dakani report-ko antichetmangna skangan on·manahaoba ia report-ko a·dok sorkari, jinmana parakkujaengachim.
Ia report-ko jinmana parakkujaengani gimin talataniko on·angengon, ia inquiry report-ko Justice Vaiphei, May 20 tarikon sorkarina on·ahachim indiba ia report namen bakroani a·sel report-ko nipilna somoi nangkuenga ine a·dokni Chief Minister Conrad K Sangma parakatahachim.
Ia report-ko sorkari nia matchotahaon ia report-o seanirangko jinmana parakatgen ineba Chief Minister parakatahachim.
