TURA: Adita salrangna skang, Tura-ni Edenbari jolo donggipa Tura-ni BJP MDC Bernard N Marak-ni baganko police-rangni chadrapanina Meghalaya BJP jegalataha aro ian BJP dolko aro BJP-ni MDC-ko ong·gija dake galonna jotton ka·anisa ong·enga ine parakataha.
“BJP MDC-ni bagano donggipa je nokkon police-rang chadrapahachim, uan gadang gittam donggipa nok ong·a aro ia nokni ka·mabatgipa gadangkode, manderang cha·chak ringchakna miksongen, banquet hall dake jakkalenga. Gnigipa gadangode ge 30 kuturirang donga aro ia kuturirangko ‘home stay’ ba manderang dongchakna gita jakkalskaenga. Gittamgipa gadangkode Garo Hills-ni dingtang dingtang biaprangoni cholgri ong·gipa bi·sarangko poraiate dongchakna gita hostel dake jakkalskaenga. Ia bi·sarang, COVID sajinmani somoionin ia biapo dongtokenga aro uamangko poraina gita Bernard Marak, dakchake on·enga. Sukrobar walo police-rangni rim·anggipa bi·sarangoni sakbongade Bernard Marak-ni dakchakanichi, Tura-ni Edenbari aro Auxilium Convent School-rango poraienggipa bi·sarangsa ong·achim. Unbaksana police-rang, ia nokko nirokenggipa mandeni jikgipa aro uni bi·sakoba rim·angaha aro ia biapo cha·ani pale cha·enggipa jiksesakoba rim·angaha,” ine Meghalaya BJP-ni Media Department, talataniko on·angenba, ia biapo me·chikrangko palenga aro me·a me·chikrangko ong·gija dake rochakna on·enga ine police-rangni matnanganiko jegalataha.
Sukrobar walo police-rangni ia biapko chadrape rim·anggipa manderangara, ‘home stay’-o tangka paisa game dongenggipa manderangsa ong·achim ine talataniko on·angengon, uawalo police-rangni rim·gipa garirangba ia manderangni garirangsa ong·achim ine Meghalaya BJP-ni dilgiparang parakataha.
“Antini bon·angachibara Tura-ni manderang ia biapona rona re·ronga aro mitamde waltunaba re·ronga. Ia biapo tangka game dongenggipa manderangara namgipa nokdangni manderangsa ong·achim aro ia biapko me·chik palchakram ine agananiara namen jegalna kragipa aro ra·chakna man·gijagipa kattarang ong·aha. Ia baganko bilsigittamna chalaianio changsaba ong·gija dake matnanganirang dongkujachim,” ine Meghalaya BJP-ni Media department parakataha.
Garo Hills-o aro mongsongbate South Tura constituency-o Tura-ni MDC Bernard Marak, mingsing minggamrorona a·bachengengahani giminsa BJP-ko aro BJP-ni state vice president Bernard Marak-ko ong·gija dake biming man·atna ia kamko NPP dol ka·aha ineba Meghalaya BJP matnangataha.
BJP-ni MDC Bernard Marak-ni janggina kenchakna nangani ong·enga ine janapatengon, uni janggina chel·chakaniko on·china gita Meghalaya BJP, a·dok sorkariko didiataha.
Indake ong·engon, an·tangko rim·na jotton ka·engani gimin kate dongenga ine songbadrango seaniko Tura-ni BJP MDC Bernard Marak jegalataha aro ua gipin biapo kam dongkuani giminsa Tura-ona re·bapilna man·kujaenga indiba salsa salgnini gisepon ua biaptangona re·bapile, police-rangni kamo bakrimaniko on·gen ine parakataha.
