SHILLONG: Re·anggipa Sonibar salo, Border Security Force (BSF) aro Meghalaya Police-ni sipairang nangrime kamko ka·enba, South Garo Hills a·jani Jatrakona buringoniko te 3200 Phensedyl samrangko rim·na man·aha.
Ia Phensedyl samrangni gamchataniara gong lak 6-mang ong·achim ine BSF official-rang u·iataha.
BSF official-rangni u·iatani gitade, bang·bea Phensedyl samrangko, Bangladesh a·songona ra·angna gita Jatrakona buringo dongnue donenga ine BSF sipairang koborko man·soani ja·man, BSF sipairang, Meghalaya Police baksa nangrime, ia biaponiko sandina re·angon, buringo dongnue donenggipa samrangko man·aha.
Ia Phensedyl gusu samko manderang pekatna jakkalrongani gimin Bangladesh a·songo ia samko champengatahachim aro uandaken manderang ia samko dam rakbee brena nangengani gimin India a·songoniko Bangladesh a·songona ra·ange manderang badingskaengachim.
Batanggimin somoirangoba iandake pekatgipa bosturang baksana ma·manti bosturangko India a·songoniko Bangladesh a·songona badingsrukangengmiting somoirango BSF-ni sipairang, nirikkianirangko dake rim·na man·ahachim.
Indake ong·engon, a·song damgnini gisepo, iandake pekatgipa sam aro ma·manti bosturangko niam gri badingsrukaniko champengna gita India aro Bangladesh a·song damgnini simako nirok sandienggipa sipai dolrang, koborrangko on·grike kam ka·enga ine BSF official-rang parakataha.
