TURA: CMDSDF-ni ning·o jolni manderangna ambulance brena on·gipa tangka paisarangni bidingo am·sandichina gita Garo Students Union (GSU) Rongjeng regional unit, Dambo-Rongjeng Development Block-ni BDO-ko didiataha.
GSU Rongjeng regional unit-ni parakatani gitade, 2019-2020 bilsini gisepo CMDSDF-ni ning·o ambulance brena gita Chellongma Kotok Socio-Economic Initiative dolna dingtangmancha tangka paisarangko chame on·ahachim aro ia tangka paisarangoni gong 16,85,000-kode dolni president-na watatmanahachim.
Indake ong·engon, tangka paisarangko on·ataoni da·o baditaba jarang ong·pilengahaoba Rongjeng jolo ambulance gital breako nika dongkujaenga ine GSU Rongjeng regional unit parakataha.
“Indita jarangni ja·manoba Rongjeng jolo ambulance gitalko nika dongkujaengani gimin iana miksonge chamatgipa tangka paisarangko jakkalbebeahama ine manderangni gisepo sing·anirang ong·kattokenga,” ine GSU Rongjeng regional unit-ni dilgiparang parakataha.
Ia CMDSDF-ni ning·o chame on·atgipa tangka paisarangara manderangni namgninasa chamatgipa tangka paisarang ong·achim ine janapatengon, iani bidingo ta·raken am·sandienba nanga gita ja·kurangko de·china GSU Rongjeng unit-ni dilgiparang, Dambo Rongjeng Block-ni BDO-ko didiataha.
