TURA: Re·anggipa Sombar attamo West Garo Hills a·jani police-rang, Assam a·dokni Mankachar-oniko Tura-ona ra·baengmiting somoio pante sakgnioniko pekatgipa samrangko man·aha.
Assam a·dokni Mankachar-oniko Tura-ona pekatgipa samrangko ra·bana sienga ine koborko man·soani ja·man police-rang, Tura-ona dakbagipa ramarango check point-rangko done, Tura-ona re·baenggipa manderangko nirikkisona a·bachengataha.
Police-rangni nirikkiengmiting somoio, ML-08G 723 Yamaha R15 bike-o Tura Ringre Gittim-oni Rex John K Sangma aro Tura Lower Balsanang-oni Bishal Ch Marak minggipa pante sakgniko, Ghoramara sambao donggipa Garobadha Police Investigation Centre-o rim·sona man·aha.
Ia pante sakgniko rim·soenba, am·sandion police-rang, rong 2856 Tramadol Hydrochloride SP capsule-rang aro rong 18 Nitcor tablet-rangko, ia pante sakgnioniko man·aha ine West Garo Hills a·jani SP VS Rathore parakataha.
Iani bidingo NDPS Act-ni dingtang dingtang dingtang section-rango pangchake mokordomako ka·aha aro police-rang, ia pante sakgni baksa sam badinganio jak donggipa gipin manderangkoba am·sandina a·bachengataha ine u·iataha.
