SHILLONG: Meghalaya a·dokni SSA skulrango skigiparang jabongani dormaharangko man·tokkujaengani a·sel neng·nikanirangko chagrongna nangtokengon, a·doko SSA-ni kamrangko name ka·na man·na gita bakan ma·mong sorkari tangka paisarangko watatgnok ine Bristibar salo, a·dokni Deputy Chief Minister Prestone Tynsong parakataha.
SSA skulrango skigiparang jabongani dormaharangko man·kujaengani gimin jingjengatanirangko dakengmiting somoio, a·dokni Deputy Chief Minister Prestone Tynsong aro Education department-ni official-rang, skigiparangko agangrikna okamenba, jabrini dormahako on·chengna ku·rachakaniko on·atahachim.
SSA skulrango skigiparangna February aro March jagnini dormahako on·na gita sorkari gong kror 44-ko watatna aro bangki jagnini dormahanaba corpus fund-oniko gong kror 78 tangkarangko jakkalchengna ku·rachakaniko on·atahachim.
Bangki jasani dormahakoba a·dok sorkari, ma·mong sorkarioniko tangka paisarangko man·soahaon on·na gita a·dok ku·rachakaniko on·atahachim.
Indake ong·engon, adita salrangna skang, a·dokni Chief Minister Conrad Sangma, Union Finance Minister-ko gronge agangrikeaha aro ia ta·raken SSA-ni kamrangna tangka paisarangko watatna ku·rachakataha ine Tynsong parakataha.
“Adita salrangna skangsan chinga Finance Ministry-ni official-rangko grongeaha aro Chief Minister an·tangba, Union Finance Minister-ko gronge agangrikeaha. Ia pilak kamrangan Finance Ministry-osa ong·engani gimin da·o SSA-na bakan tangka paisarangko watatna Union Minister ku·rachakaniko on·ataha,” ine Deputy Chief Minister parakataha.
