TURA: Bristibar salo, Garo Hills Autonomous District Council (GHADC)-ni session-ko ong·atanio, Opposition MDC-rangni chanchirimna ra·anggipa motion-rangko NPP-chi dilenggipa Executive Committee (EC) jegalahani gimin Opposition MDC-rang, session-oni jinma ong·katgrime kataha.
Ia session-ni gnigipa salo, Opposition MDC-rang, minggni motion-ko chanchirimna ra·angahachim indiba ia motion-rangko EC ra·chakjahani gimin Opposition MDC-rang, session-oni ong·katgrime kataha.
Skanggipa motion-o GHADC-ni election-rango gipin jatrangni bak ra·paaniko champengna gita dingtang electoral roll-ko tariani bidingo chanchirimna Williamnagar-ni MDC Alphonsush R Marak ra·angahachim indiba ia motion-ko NPP-chi dilenggipa Executive Committee ra·chakjahachim.
Gnigipa motion-o Garo Hills-ni B-Mahal-o nangchakegipa kamrangni gimin chanchirimna gita Dengnakpara-ni MDC Sadhiarani M Sangma aro Kharkutta-ni MDC Cherak W Momin, motion-ko ra·angskaahachim aro ia motion-koba EC jegalataha.
GHADC-ni session hall-oni jinma ong·katgrimani ja·man kobor ra·timgipa manderang baksa agangrikengon, Garo Hills-ni B-Mahal-o ga·akgipa a·arangko Meghalaya Industrial Development Corporation (MIDC) aro Meghalaya Tourism Development Corporation (MTDC)-na NPP-chi dilenggipa Executive Committee pale galengani ine koborko man·soahani giminsa EC-oniko tale ra·na gita ia motion-ko ra·baahachim indiba ia motion-ko Executive Committee ra·chakjaha ine Kharkutta-ni MDC Cherak W Momin parakataha.
Iani bidingo Chief Minister Conrad Sangma aro IAS official saksani dongpaanichi re·anggipa May-ni 20 tariko tom·aniko ong·ataha ine tom·anio dongpagipa manderang aganahani gimin ian kakket ong·na nanga ineba Momin parakataha.
Iani bidingo Dengnakpara-ni MDC Sadhiarani M Sangma-ba kobor ra·timgiparangna talataniko on·angengon, ia a·arangko a·dok sorkarini MIDC aro MTDC-na on·ahani gimin gong lak 58-kode GHADC-na gamanaha ine koborko man·soaha ine parakataha.
Ia a·arangkora GHADC-ni ning·osa nirok sandigipa ong·ani gimin ia a·arangko a·dok sorkarina pakwate on·bebeaha ong·ode B-Mahal-ni ning·o donggipa dam 200 songrangna neng·nikanirangko ra·bagnok ineba Sangma parakataha.
Indake ong·engon, GHADC-na dingtang electoral roll-ko tariani bidingo chanchirimna ra·bagipa motion-ko NPP-chi dilenggipa EC, changgittamna kingking jegalaha ine Williamnagar-ni MDC Alphonsush R Marak, an·tangni suk ong·gijaniko parakatskaaha.
