SHILLONG: Meghalaya a·dokni sorkari LP skulrango contract-na skigiparang, Meghalaya Teachers Eligibility Test (MTET)-ko seanio chu·sokgipa ong·pajahani gimin, kamtangtango rakkipilchina gita sorkario dabiangtokaha.
Sombar salo, Meghalaya Government LP Contractual Teachers Association (MGLPCTA)-ni ning·o donggipa skigiparang, an·tangtangko kamo rakkipilchina dabie Chief Minister-ni dongchakgipa nok sambao jingjengatangahachim indiba ja·mano skigiparangko, sorkari official-rang, MBOSE office sambaona apjitataha.
Jingjengatenggipa skigiparangni parakatani gitade, LP skulrango contract-na skigiparangko 2010 aro 2012 bilsirango kamo rakkiahachim indiba 2018-19 bilsirango MTET porikkako a·bachengatani ja·man contract-o skigiparangni kamko sorkari bon·atahachim. Iani bidingo uamang a·dokni Chief Minister-ko gronge agangrikeon, skigiparangni dabianiko niatna gita Chief Minister ku·rachakataha ineba skigiparang parakataha.
Sorkarini LP skulrango contract-na skigipani kamko ka·enggipa manderangni kamko 2021 bilsio sorkari bon·atani ja·man da·o komibeoba sak 800 skigiparang, kamtangtangko on·pilchina sorkario dabiengachim ine nikna man·a.
“MTET-ko 2010 bilsion parakatahaoba porikkako 2019 bilsiosa ra·chengaha aro ua somoio chingoni bang·batan bilsi batahani a·sel kamna qualify ong·tokjaha,” ine MGLPCTA-ni dilgipa Birbor Riangtem parakataha.
Skigiparang da·o sorkarini gipin kamrangna dorgasto galpana gitaba man·jahani gimin da·o uamang an·tangtangni kam neng·takaonan kamko ka·angkuna nangnikenga ineba ua parakataha.
