NEW DELHI: Mongolbar salo, Tura-ni MP aro NPP-ni dilgipa Agatha K Sangma, Mahendraganj-ni Kendrikona-o donggipa Jawahar Navodaya Vidyalaya (JNV)-o chagrongna nangenggipa dingtang dingtang neng·nikanirangko Parliament-o janape on·angaha.
Tura MP-ni Parliament-o parakatani gitade, ia skulo bijoli aro chirangko chu·onge man·jaengan baksana dingtang dingtang neng·nikanirangko chagrongna nangtokengachim.
Mahendraganj JNV-o poraienggipa chatro chatrirang aro kam ka·enggipa manderangna naljokaniko on·ani gimin janapangengon, ia campus-o boundary wall-ko matchote rikna man·kujaengani a·sel chatro chatrirangna aro skulo kam ka·enggiparangnaba kenchakna nangani ong·enga ine ia skulna ta·raken boundary wall-ko rike on·china sorkariko didiangaha.
Ia skulona chi salangenggipa pipe-rang gitchambeahani a·sel chirang joksrue bon·enga ineba ua ia skulna gital chi pipe-rangko sale on·china Lok Sabha-o didiangaha.
Skulo poraienggipa chatro chatrirangna kal·chakram biapko nangchongmota ine janapangengon, ia skulo kal·chakramko rike on·ani bidingo skulni dilgiparang changni chang sorkariko didiahachim indiba ia skulo chu·onga gita biaprang dongkujaenga ine Tura-ni MP parakataha.
“2004 bilsini January jana skang, JNV-o kam ka·enggiparangna CCS Pension scheme (1972)-ko on·ani bidingo chanchichina anga sorkariko mol·molenga,” ineba ua aganaha.
Agatha-ni parakatani gitade, JNV-rangara a·songni songadam nokadamrango donggipa chatro chatrirang, jemangan changgipa sapgiparang ong·achim, uandakgipa chatro chatrirangna nambatgipa central skulrang gita ong·engachim.
