BAGHMARA: South Garo Hills-ni Baghmarao chaljarango chipe katomgimin bang·a koelarangko rim·a man·ani ja·mano South Garo Hills-ni police department sandianirangko dakaha aro mokordomakoba segataha, je katomgimin koelarangkon Simsang chibima gita Bangladesh-ona watatna miksonge donengachim.
Koboro gita, chaljao chipe dongimin koelarangko Bangladesh-ona chaprango ra·angna gita tarie donengachim. Ia koelarangko Simsang chibima rikamoniko bikotaha aro chibima gitan bilsi gimikan ra·angengachim. Indake ong·engon, bilsi gimikan man·genchimoba sin·karini ja-rango bang·bate koelarangko bikotengachim.
Chaljarango koela chipe katomgimin photorang a·jolo pringni bako namen giproroengachim, jeni bidingon authority-rangni kosako sing·anirangba nakatengachim.
Unaskang, BSF official-rango singaton, batanggimin adita salrangni gisepode koelarangko serika dongkujaenga ine aganataha. Indake ong·genchimoba, iandake cha·u bading chiwalanirang donga ingipakode uamangba aganatahachim.
“Rim·a man·gipa koelarangko Simsang chibima rikamrangonikon bikotenba chaljarangko katome donahachim. Indake jensomoio badingatna gita bikotgimin koelarang chu·ongaha ine nikon, uamang uamangni dolrangna kobor on·atenba ring ba chaprango Bangladesh-china watatengachim. Chinga mikrake nitimrongenga aro bang·en indakgipa kamrangko rim·a man·aha indiba iandakgipa badinggiparang, walosa koelarangko ra·angbatenga” ine saksa BSF official parakaha.
Indake ong·engon, da·oni obostaode, police-ni sandie man·ani gitade, ia koelarangko re·anggipa July jaon rim·a man·aha aro Simsang Chibima sambaon name chel·chake donengachim. Indake police-na pakwatatna skang ia koelarangko BSF-an rim·ahachim.
“Chaljarango katomgimin koelarangko maina chibima rikamo donenga ine matnange badi ka·anirangko man·soani ja·mano police sandianirangko dakaha. Indake a·selrangko sandie nion, koelarangko re·anggipa jaon rim·aha ine man·sina man·aha” ine superintendent of police, SGH, Rithuraj Ravi S talataniko on·enba manderangni jajaanirangko chel·ataha.
