TURA: Road Safety ba ramarango naljoke dongani, POCSO Act, Cyber Frauds ba internet gita manderangko cha·bokani, Drug Abuse ba pekatgipa samrangko jakkalani namgijani aro ‘Har Ghar Tiranga Campaign’-ni bidingo jolni manderangna agan-talatanirangko on·na gita re·anggipa Sonibar salo, North Garo Hills a·jani police-rang, Bajengdoba Block Development Block baksa nangrime dingtangmancha awareness program-ko North Garo Hills a·jani Bajengdoba police station-o ong·atangaha. Ia awareness program-ko ong·atanio, Bajengdoba police station-ni ning·o donggipa dam 200-na baten songni nokni dilgiparang bakko ra·angtokaha aro uamangna North Garo Hills a·jani police officer-rang, kosako janapgimin katta bichongrango pangchake agan-talatanirangko on·angaha. India a·songni jakgitelaniko man·aoni bilsi 75 gapaniko maniani bak gita ma·mong sorkarini ra·gatgipa ‘Har Ghar Tiranga’ campaign-ni gimin talataniko on·angengon, re·baenggipa August 13 tarikoni August 15 tarikona noktangtango a·songni nisanko songe donchina gita police officer-rang, songni nokni manderangko didiataha.
