SHILLONG: Re·baenggipa 2023 bilsini Meghalaya Assembly election-o a·dokni Trinamool Congress (TMC), dam 60 seat-rangon susae, National People’s Party (NPP) aro Meghalaya Democratic Alliance (MDA)-o bakrimenggipa dolrangko warachakna miksongenga.
TMC-ni dilgipa aro a·dokni gitcham chief minister Mukul Sangma-ni parakatani gitade, re·baenggipa bilsini Assembly election-o TMC, a·dokni pilak dam 60 seat-rangon susagen aro TMC-ni bang·bata candidate-rangan gital ong·gen.
“Meghalaya a·doko TMC-ko bilakbatatna gita chinga dam 60 constituency-rangon susana miksongenga. An·ching dingtangani gimin aganengon, nambatatna nangani giminba aganna nanga,” ine Sangma aganaha.
Bang·bata constituency-rangnan uamang candidate-rangko sandimanaha aro candidate-rangni bimingko somoi sokahaon jinmana parakatgen ineba Sangma aganaha.
Je constituency-rangon uamang candidate-rangko seokkujachim, uandakgipa constituency-rango manderang, uamangni tik ka·e on·aniko sengtokenga ineba TMC-ni dilgipa parakataha.
“Je manderangan a·doko ong·enggipa obostarangni gimin suk ong·jaengachim, uandakgipa manderangba ching baksa bakrimgen ine anga ka·dongenga. Ia nitobegipa a·dokko rikna chingni skanio bang·a manderangkon chinga ching baksa bakrimena ka·dongsoenga,” ine Sangma aganaha.
NPP-chi dilenggipa MDA sorkarini bang·bata MLA-rangan, 2023 bilsini election ja·mande gital dilgiparangna wate on·skagnok ineba Opposition dolni dilgipa, an·tangni ka·dongsoenganiko parakataha.
“Angni nikani aro koborrangko man·soani gitade, election-ni ja·man da·o ong·enggipa MLA-rangoni bang·batan dongjawaha,” ine Sangma aganaha.
NPP-ni MLA-rangko TMC rime katna jotton ka·enga ine matnangenggiparangna aganchakaniko on·angengon, “Chinga darangkoba rime katna nangani katta dongja maina constituency ge·antion manderang chingni dol baksa bakrimtokenga,” ine TMC-ni dilgipa parakataha.
