SHILLONG: Re·anggipa bilsio Hynniewtrep National Liberation Council (HNLC)-ni gitcham general secretary Cheristerfield Thangkhiew-ko police-rangni so·otgalaniko gisik ra·e da·al August-ni 13 tariko, nisan gisimko ra·e jingjengatanirangko dakna parakatmanahani gimin ia salo maming so·sojengjeng ong·ataniko ra·baskajachina gita a·dokni Deputy Chief Minister Prestone Tynsong, Mawlai jolni dilgiparangko aro dingtang dingtang dolrangko didiataha.
HNLC-ni gitcham dilgipako police-rangni so·otgalanina jegale aro iani bidingo inquiry dakani report-ko ta·raken manderangna parakchina dabie Mawlai jolo donggipa dingtang dingtang dolrang, ‘Sur ka Bri U Hynniewtrep’-ni bimingo, da·al August-ni 13 tariko, a·songni nisanrangko songdoani pal, nisan gisimko ra·e jingjengataniko dakskana tik ka·manahachim.
India a·songni jakgitelaniko man·aoni bilsi 75 gapaniko maniani bak gita a·song gimikon da·al August 13 tarikoni a·bachenge August 15 tarikona noktangtango a·songni nisanrangko songdochina sorkari u·iatahaoba, HNLC-ni gitcham dilgipako so·otanina jegale aro ia a·selni report-ko jinmana parakchina dabie Mawlai jolo songdongenggipa manderang, a·songni nisanrangko songdoani pal, nisan gisimko ra·e sorkarini kosako jingjengatskana tik ka·angahachim.
Indake ong·engon, HNLC-ni gitcham dilgipako gisik ra·e program-rangko ong·atengoba, maming so·sojengjeng ong·aniko ra·baskajachina a·dokni Deputy Chief Minister, Mawlai jolni dilgiparangko aro dingtang dingtang dolrangko mol·molataha.
Ia a·selni bidingo inquiry dakani report-ko re·baenggipa jao Assembly-ni session-ko a·bachengatanio session-ona sorkari ra·bana sienga ineba Tynsong parakataha.
Ia report-ni bidingo special session-ko ong·atna nanggenma ine sing·on, “Special session-rangko ong·ataniara ramram katta ong·ja aro iani bidingo special session-ko ong·atna nangani katta dongja. Assembly-ni session-ko ong·atani skanggipa salon ia report-ko session-ona ra·anggen, uni gimin chinga manderangko chakchike sengkuchina mol·molatenga,” ine Tynsong aganaha.
