SHILLONG: Meghalaya a·doko BJP dolna namgija obostako ra·baaha ine matnangenba, nama bewalo kamoni neng·takchina gita BJP Meghalaya-ni state president Ernest Mawrie-ko BJP-ni national vice president Meghalaya in-charge M Chuba Ao didiataha.
BJP state president-ni kamo suk ong·gijaniko parakatengon, “BJP dolara ua an·tangni dol ong·ja ine ua (Ernest) ma·sina nanga. Seoka man·gipa membor-rangko aro candidate ong·na sikenggipa manderang baksana a·songni Prime Minister Narendra Modi aro BJP-ni national president JP Nadda-koba ua kragija intekaha,” ine Ao parakataha.
Mawrie-ni kam ka·ani bewalara uko NPP-na kam ka·gipa gita dake chanchichipna kraataha ineba Ao aganaha.
Ao-ni parakatani gitade, 2023 bilsini Assembly election-o BJP-ni candidate-rang susagija NPP dolko altuae chena on·na gitasa Mawrie jotton ka·enga ine ua chanchichipenga.
“Meghalaya a·doko BJP dolko namgijagipa obostao ong·atmanaha. Uni gimin BJP-ni state president Ernest Mawrie, a·songni Prime Minister aro Nadda jiko mande ra·ani gnang, nama bewalo kamoni neng·takna nangengaha,” ine Ao aganaha.
