SHILLONG: Re·baenggipa 2023 bilsini Assembly election-na skang, Meghalaya Democratic Alliance (MDA)-ni darang dol baksaba bakrimani dongjawa ine United Democratic Party (UDP) parakataha.
“Ia election-o chingaba an·tangari susana re·mikkangenga aro ia chango chinga dam 30-na bate seat-rangko cheenba an·tangtangni sorkariko riknasa miksonganirang dongenga,” ine UDP-ni president Metbah Lyngdoh, kobor ra·timgiparangna parakataha.
MDA-o bakrimenggipa pilak dolrangan da·o dipet election-na skang nangrime kam ka·ani gimin janapa dongkujaenga ineba ua talataniko on·angaha.
Regional Democratic Alliance (RDA)-ni ning·o UDP, Hill State People’s Democratic Party (HSPDP) baksa bakrimangkugenma ine sing·on, UDP aro HSPDP dolgnian term matchotkujaskal, RDA-o on·kanganiko rakkiangkugen ine Lyngdoh parakataha.
Ia term matchotani ja·manoba MDA dongkuaigenma ine sing·on, da·o dipet iani bidingo aganna gita agre seng·gnangdugakuenga ine Lyngdoh, mamingkoba agandapna jechakaha.
“Da·o dipet chingni miksonganide re·baenggipa election-na kamrangko ka·samsoanisa ong·enga,” ine UDP-ni president aganaha.
Lyngdoh-ni parakatani gitade, ia sal somoirango bang·a manderangan UDP-na chakpaanirangko on·engani gimin mikkang bilsini election-o uamang name dakna ka·dongenga.
“Manderang UDP-o ka·dongchaktokengani gimin chinga ia cholko ra·e chegipa ong·na ka·dongenga,” ine ua aganaha.
2018 bilsini Assembly election-o UDP dol, seat damdokko cheahachim aro uni ja·man Ranikor, Shella aro Mawphlang by-election-rangoba chee seat-rangko man·dapahachim.
