SHILLONG: Election-ni somoirango mitam dolni manderang, candidate-rangoniko tangka dabie ra·ronga ine Sukrobar salo Gambegre-ni NCP MLA Saleng A Sangma, suk ong·gijaniko parakatenba, a·dokni namroro silroroanina Meghalaya a·doko aro a·song gimikon tangka paisa gri election-ko ong·atna nangenga ine parakataha.
Re·baenggipa 2023 bilsini Assembly election-o Garo Hills-o ong·na sienggipa obostarangni gimin janapatengon, election-ni somoio Garo Hills-ni gimin aganna namen neng·ani ong·a maina manderang dingtang dingtang kamrangni bidingo sorkariko jegalgenchimoba election-ni somoirangode uarangko gualrongaia ine Sangma parakataha.
“Kakketko agangenchimode pu·one seokgipa manderangonin 20 percent-de politics kal·na jotton ka·ronga aro uamang pilak candidate-rangonikon tangkarangko gile ra·ronga,” ine Sangma aganaha.
Election-ni somoio pilakande candidate-rangoniko tangka gile ra·ja indiba 20 percent-ni gitasan tangka paisarangko bi·e ra·ronga ine janapatengon, 80 percent-ni gitade manderang, an·tangtangni candidate-rangnan ka·sae kamko ka·ronga ine NCP-ni state president parakataha.
Garo Hills-o Trinamool Congress (TMC)-ba da·o dongahani gimin sing·on, Garo Hills-o PA Sangma sagian TMC-oni susae MP-na seokakako man·ahani gimin Garo Hills-o TMC-ara gital dol ong·ja indiba dilgipasa PA Sangma sagioni Dr Mukul Sangma-ona dingtangskaaha ine Saleng parakataha.
Meghalaya a·doko ua saksakamkamsan Nationalist Congress Party (NCP)-oni susaengani gimin doltangko watna miksonganirang dongama ine sing·on, da·o dipet ua iandakgipa kamrangko ka·na miksongani dongja aro adita salrangna skangsan ua NPP-ni dilgipa Praful Patel aro Sharad Pawar-ko New Delhi-o gronge, Meghalaya a·doko NCP-ko bilakdapatani gimin agangrikangaha ine NCP-ni state president parakataha.
