SHILLONG: Petrol-ni damrangko gong 1.50-chi bariatenba, tourism festival-rango gong kror 12-oni kror 14-mangona kingking koros ka·na gita a·dok sorkarini manchisamsoaniko dingtang dingtang dilgiparang raken jegalgrimtokaha.
Iani bidingo Civil Society Women’s Organisation (CSWO)-ni president Agnes Kharshiing, an·tangni suk ong·gijaniko parakatengon, petrol aro diesel-ni kajinarangko bariataniara dingtang dingtang bosturangni damrangko bariatani gitasa ong·e ramram manderangnasa neng·nikaniko ra·baani gita ong·gnok ine parakataha.
“Petrol aro diesel-ni kajinarangko bariate dingtang dingtang festival-rango gong krorni kror tangkarangko koros ka·na sorkari miksongskaenga. Ian a·doko songdongenggipa manderangna ra·chakna man·gijani ong·enga,” ine Kharshiing aganaha.
Apsan daken a·dokni mitam MLA-rang aro BJP-ni dilgipa Alexander Laloo Hek-ba, petrol aro diesel-ni damrangko bariate, festival-rangko ong·atanio gong kror 14 tangkarangko koros ka·na tik ka·aniko raken jegalattokaha.
Festival-rangko ong·atanio indita tangka paisarangko koros ka·e galana bate ia tangkarangko sorkari, skigiparangni man·na nangkuenggipa dormaharangko aro dingtang dingtang department-rango contract-na kam ka·enggiparangni dormaharangko on·na jakkalskana man·achim ineba Hek aganaha.
Kajinarangko man·dapna gita petrol aro diesel-ni kajinarangko bariatanichi a·doko songdongenggipa manderangna neng·nikanirangko ra·baengon, festival-rangko ong·atanio indita tangka paisarangko koros ka·e galaniara namen kragijani ong·enga ineba BJP-ni dilgipa parakataha.
Sorkarini iandakgipa ja·kuko de·na parakataniko Shillong-o songdongenggipa saksa J Jyrwa-ba jegalatengon, ua festival-rangko ong·atanikode jegala ong·jaenga indiba indita tangka paisarangko koros ka·e galanikosa jegalatenga ine parakataha.
