SHILLONG: Meghalaya a·doko ‘Progress’ scheme-ko ra·gatanichi songni nokni manderangna aro game ge·e cha·enggiparangna wakrangko jile cha·na on·anichi pangkamgipa janggi tangani cholrangko on·na ka·dongenga ine Budbar salo, a·dokni Chief Minister Conrad K Sangma parakataha.
National Livestock Mission-ni ning·o ‘Progress’ ine mingskagipa Rural Backyard Piggery Scheme-ko Ri Bhoi a·jani Byrnihat-o a·bachengate on·anganio a·dokni Chief Minister, jinmana aganprakangengon, dingtang dingtang namroro silroroani scheme-rangko ra·gate on·anichi ia sorkari, game ge·e cha·enggipa manderangna tangka paisa man·dapani cholrangko aro janggi tangani gadangko namdapatna man·engaha ine parakataha.
“Game ge·e cha·enggipa manderang, wakrangko jilanichi, pangkamgipa janggi tangani cholrangko man·china gita ia ‘Progress’ scheme-ko sorkari ra·gate on·aha,” ine Sangma aganaha.
Meghalaya a·doko wakrang chu·ongjaengani a·sel metric ton 18,000-mangni gita wak be·enrangko gipin a·dokrangonikosa ra·bana nangenga ine janapatengon, ia piggery scheme-ko ra·gate on·anichi a·doko wak be·enrangni chu·onggijaniko namatna ka·dongenga ine Chief Minister parakataha.
Ia ‘Progress’ program-ko a·bachengate on·ani bidingo talataniko on·angengon, songadam nokadamrango wakrangko, do·orangko, do·bokrangko aro uandakgipa gipin jilla kaanirangko dake an·tangtangni janggi tangani gadangrangko namdapatna man·na gita sorkari, ia scheme-ko ra·gataha ine Chief Minister parakataha.
Chief Minister-ni parakatani gitade, Rural Backyard Piggery Scheme-ni skanggipa bako sorkari, gong kror 15.18 tangkarangko chame donaha aro iani ning·o bi·sa pe·ninggipa rokomni wakrangko ge 6000 nokdangrangna suale on·anggen.
Ia program-ni gnigipa bakko a·bachengatani bidingo janapatskaengon, ia program-ni gnigipa baknaba sorkari, gong kror 25 tangkarangko chamdape on·gen ine Chief Minister parakataha.
‘Progress’ scheme-chi game manderangna janggi tangani cholrangko on·na man·gen: CM
Date:
Share post:
