SHILLONG: BJP-ni state president Ernest Mawrie-na ma·mongni BJP dilgiparang, una on·gimin term-ko matchotatna on·na tik ka·angaha ine u·iataha.
Koborko on·ani gitade, BJP-ni national general secretary (organisation) BL Santosh, Union Minister of State Arjun Ram Meghwal, national vice president aro Meghalaya-ni in-charge M Chuba Ao-ni dongpaanichi tom·e chanchirimangenba, Mawrie-na dongimin term gita BJP-ni state president ong·na on·na gita manchie donangaha.
Ia tom·anio BJP Meghalaya-ni dilgiparang aro dingtang dingtang membor-rangba dongpae bak ra·angtokaha.
BJP doloni koborko on·ani gitade, Mawrie-ko state president ong·aoniko ra·galchina dabienggipani bidingo ma·mong aro a·dokni BJP dilgiparang chanchirimangenba, Mawrie-na dongimin term-ko matchotatna on·na gita tik ka·angaha.
Mawrie-ni state president ong·e kamko ka·anio, uni bil jakkale kam ka·aniko BJP-ni mitam dilgiparang suk ong·niktokjaenba, uko kamoniko ra·galchina dabitokahachim ine nikna man·a.
Mawrie-ko ra·galchina dabienggipani bidingo Meghalaya-ni in-charge M Chuba Ao-o sing·on, “Ian saksa sakgni dilgiparangni ma·sisretanirangsan ong·aia. Uni kosako saoba maiba neng·nikanirang donggenchimode gipinrangchi re·ange matnangana bate dilgiparangona re·bae talatna man·ode nambata,” ine parakataha.