TURA: Paikan-oni Garo Hills-ona dakbagipa National Highway (NH-51) ramako taridapani bidingo North Garo Hills a·jani Mendal jolrango donggipa Nokmarangna, Sordarrangna aro songni nokni manderangna agan-talate on·na gita re·anggipa Mongolbar salo dingtangmancha tom·aniko North Garo Hills a·jani Mendal Community Hall-o ong·atangaha.
Ia tom·aniko ong·atanio North Garo Hills a·jani Deputy Commissioner RP Marak, Additional Deputy Commissioner (Revenue), Bajengdoba aro Resubelpara-ni block development officer (BDO)-rang, GHADC, PWD aro NHIDCL-ni official-rangba dongpae, ia ramako taridapanio nangchakegipa dingtang dingtang kamrangni bidingo songni Nokmarangna, Sordarrangna aro jolo songdongenggipa manderangna agan-talate on·angtokaha.
Ramarangko apalbatatna gita a·arangko breani giminba ia tom·anio a·a nokgiparang baksa agan-chanchirimangenba, manderangni ma·sie ra·na nanganirangko agan-talate on·angaha.
