SHILLONG: Meghalaya a·dokni dingtang dingtang biaprango passenger/tourist ropeway-rangko tarina niamko donna gita Budbar salo a·dok sorkari, Meghalaya Ropeway Bill 2022-ko ra·chakangaha aro ia Bill-ko da·o ong·atna sienggipa Assembly session-o chanchirimna gita ra·anggnok.
Cabinet tom·a matchotani ja·mano kobor ra·timgipa manderang baksa agangrikengon, Shillong Peak Ropeway-na New Development Bank-ni ning·o gong kror 140-mangko chamgen ine a·dokni Chief Minister Conrad K Sangma parakataha.
“Ia Bill-ara, a·dokni dingtang dingtang biaprango ropeway-rangko tariani bewal aro niamrangko on·anggen aro apsan somoion licence-rangko tariani niam aro ropeway-rangko naljokani gnang tarina ku·pattianirangba donggen,” ine Chief Minister parakataha.
Ian manderangni aro mongsongbate gipin biaprangoni re·baenggipa manderangna naljokaniko on·na dakchakani ong·gen ineba ua aganaha.
“Ia Meghalaya Ropeway Bill 2022-ko da·al salni bako Cabinet ra·chakangaha aro da·o Meghalaya Assembly-ni Session-ona ra·anggnok,” ine Sangma parakataha.
