SHILLONG: Re·anggipa bilsini August 13 tariko, Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so·ote galgipani bidingo Criminal Bureau of Investigation (CBI)-chi sandirokataniko dakchina sianggipa mandeni nokdang, a·dok sorkario dabiangaha.
“Gitcham Justice T Vaiphei-ni inquiry-ko dakani report-on angni adatangko police-rangni chanchininggija kam ka·anichi aro nangana bate bil jakkale ja·ku de·ani a·selsa so·otaha ine parakahani gimin ia report-ni bidingo CBI-ba sandirokaniko dakdapna nangenga,” ine so·otako man·gipa HNLC-ni gitcham general secretary Cheristerfield Thangkiew-ni jonggipa Granary Starfield Thangkhiew, Robibar salo, kobor ra·timgiparangna parakataha.
HNLC-ni gitcham dilgipako so·otanio maiba ong·gija miksonganirang dongama dongja, uko CBI sandirokna man·gen ineba ua aganaha.
Gitcham Justice T Vaiphei-ni tarigimin inquiry report-ko uamang ra·chakenga ine janapatengon, inquiry report-o pangchake, dos donggipa police officer-rangni kosako a·dok sorkari, ta·raken mokordoma ka·na nanga ine sianggipa mandeni jonggipa parakataha.
