TURA: Re·baenggipa 2023 bilsini Assembly election-o susana man·na gita Tura-ni MDC aro BJP Meghalaya-ni state vice president Bernard N Marak-ni case-ko independent inquiry dakatchina gita BJP Tura City District Committee (TCDC), ma·mongo BJP-ni dilgiparangko didiataha.
Iani bidingo BJP-ni national general secretary (organisation) BL Santosh-na sedoatengon, BJP Meghalaya-ni state vice president Bernard Marak, an·tangko BJP dolna on·kange kam ka·gipa ong·e Garo Hills-o BJP-ko niksengatna aro bilakbatatna man·engahachim aro a·dok sorkarini ong·gija dakgipa kamrangna ua ku·rang on·dilengani giminsa uni kosako tol·e case-ko ra·gatenba pattoko donataha ine BJP TCDC-ni dilgiparang parakatenba, re·baenggipa 2023 bilsini Assembly election-o Meghalaya a·dokni chief minister Conrad Sangma baksa South Tura constituency-o susana man·na gita uni case-ko jakgitele sandirokatchina mol·molataha.
Meghalaya a·doko BJP-ko dilenggiparangni gisepo adita meligrikgijanirang ong·engani giminba BJP TCDC-ni dilgiparang suk ong·gijaniko parakataha aro ia meligrikgijanirangko ta·raken namatchina ma·mongni BJP dilgiparangko didiataha.
Indake ong·engon, Meghalaya a·doko BJP-ni kamrangko name ka·angkuna man·na gita Ernest Mawrie-ko uni term matchotkujaskal BJP-ni state president ong·angna on·china gitaba BJP TCDC-ni dilgiparang, BJP-ni national general secretary-ko didiataha.
Tura-ni BJP MDC Bernard Marak-ko ‘Rimpu Bagan’ mamlao pangchake Tura jail-o donatahachim ine nikna man·a.
