SHILLONG: Gital rikenggipa Tura medical college, bobil dake chakatgipa manderangna dongnuchakna gita naljokgipa biap ong·enga ine Bristibar salo, Gambegre-ni MLA Saleng A Sangma matnangataha.
Saleng-ni Assembly-o parakatani gitade, adita salrangna skangsan, sak 70-mangni gita bobil dake chakatgipa manderang, gital rikenggipa Tura medical college-o dongnuchakenga ine ua koborko man·soahachim.
Tura-o gital rikenggipa medical college-ko nirok sandianirang dongjaengani gimin ian ong·gija dakgipa manderangna dongnuchakna gita namgipa biap ong·enga ine janapatengon, iani bidingo sorkari, koborrangko man·soa dongama ine Gambegre MLA sing·doangaha.
Saleng-ni sing·anirangna aganchakaniko on·angengon, da·o dipet gital rikenggipa Tura medical college-o iandakgipa kamrangni gimin ua maming koborrangko man·soa dongkuja ine a·dokni Health Minister James K Sangma parakatskaaha.
Iani bidingo, am·sandianirangko dakchina gita ua Home (Police) department-na ge·etaniko on·anggen ineba ua ku·rachakaniko on·angskaaha.
“MLA-ni agananiko chinga knae ra·rikaha aro iani bidingo nanga gita ja·kurangko de·e am·sandichina Home (Police) department-na u·iatskagen,” ine Health Minister aganaha.
Tura medical college-ko a·bachengatna gita sorkari raken kamko ka·enga ineba Sangma parakataha.
“Iani bidingo kamrangko nirokna gita chinga committee-ko songaha aro ia committee-ko Health department-ni secretary dilenga,” ine ua parakataha.
Tura medical college-ko rikani da·o 33 percent matchotengaha ine iana skangsan Health Minister parakatahachim.
