TURA: Tura jillani cha dokkanrango man·gipa cha·ani bosturangko dam bariatanina Tura-ni police-rang, Tura-ni MDC Bernard N Marak aro Meghalaya Chamber of Commerce (MCC)-ko matnangani ja·man da·o iako Sweets & Confectionaries Association (SCA) jegalatskaenba, ia cha·ani bosturangko dam bariatanio MDC aro MCC-ni membor-rang maming dakeba jak dongja ine talataniko on·angskaaha.
Adita salrangna skang, rim·ako man·gipa Tura-ni MDC Bernard N Marak-ni ning·o chalaienggipa Meghalaya Chamber of Commerce (MCC)-ni manderang, Tura-o dokkan dakenggiparangoniko kajinarangko gile ra·engani a·sel ma·manti bostuni damrang aro mongsongbate cha dokkanrango man·gipa cha·ani bosturangni dam rakbataha ine matnangenba, Tura MCC-ni kosako West Garo Hills Police-ni gita FIR ka·doangahachim ine nikna man·a.
Manderangni badi ka·anirangko man·soenba police-rang, dokkanrango palenggipa cha·ani bosturang dam rakbatengani gimin am·sandianirangko dakon, ia dokkanrangko MCC-ni manderang didiahani a·selsa cha·ani bosturangni dam rakbataha ine ma·sina man·aha ineba West Garo Hills a·jani SP parakatahachim.
Indake ong·engon, Tura-ni MDC Bernard Marak aro MCC-ni kosako matnanganiko SCA-ni membor-rang jegalatskaenba, cha·ani bosturangko dam bariatanio uamang jak dongja aro association-ni membor-rang an·tangtangan obostani kri cha·ani bosturangko dam bariatna nangaha ine talataniko on·angaha
“Ma·manti nangchongmotgipa bosturang, jekai cha·ani to, gas aro uandakgipa dingtang dingtang bostuni damrang tang·doahani a·selsa association-ni membor-rang apsan chanchirimenba, cha·ani bosturangko dam bariatna nangaha. Indake ong·genchimoba cha·ani to aro uandakgipa ma·manti bosturangni wholesale rate-rangko komiatpilani ja·man chinga misti aro uandakgipa dingtang dingtang cha·ani damrangko ia bilsini May jana skang ong·a gitan apsan dake komiatpilaha,” ine SCA-ni president Daullat Chada Marak parakataha.
