SHILLONG: Gari jakkalsreta ine matnangenggipani bidingo Meghalaya Police, Home Department-na report-ko on·aha aro police-rangni kosako matnanganirangko talatchina Home department, ge·etaniko on·angskaaha.
Iani bidingo kobor ra·timgiparangna talataniko on·angengon, gari jakkalsreta ine matnangenggipani report-ko police-rang, Home department-na on·atmanaha aro department uamangko, police-rangni kosako matnangani lekkarang, sakkirang aro uandakgiparangko on·china ge·etangskaaha ine Sukrobar salo, a·dokni DGP LR Bishnoi parakataha.
Report-o biming minggipa officer GK Iangrai-ko kam dontongatkujaenga ine talataniko on·angengon, “Department-na nangchongmota lekkarangko aro sakkirangko on·ani ja·manosa sorkari, department-ni gita ja·ku de·ani bidingo chanchianggen,” ine DGP parakataha.
Garirangko jakkalsreta ine police-rangni kosako matnanganirangko Inspector General of Police (Law & Order) MK Singh, Deputy Inspector General of Police (ER) DNR Marak, 1st MLP Battalion-ni Commandant CA Lyngwa, SP (Anti-Infiltration) JG Momin aro Central Workshop-ni official in-charge B Khongwir-chi inquiry dakangahachim aro inquiry-ko dakanio police-rangni bang·en kam ka·sretanirangko nikna man·ahachim.
HNLC-ni gitcham dilgipako so·otanio jak donggipa dolni kosako mai dakgipa ja·kuko de·na sienga ine sing·skaon, sorkari ia officer-rangoniko aro sianggipa mandeni nokko chadrapgipa dolni sipairangko sing·sandichenggen ine DGP parakataha.
Jowai jail-oni koidirang joke katgipani bidingo janapatskaengon, ia jail-ona dolsa police officer-rang re·ange nieaha aro ia jail-o bang·bata CCTV camera-rangan kam ka·ja ine nikna man·aha indiba da·o Jowai jail-o police-rangko bilakbate donataha ine DGP parakataha.
