SHILLONG: Jal Jeevan Mission (JJM)-ni kamrangko chu·sokatanio Meghalaya a·dokkoba nambatsranggipa a·dokrangoni damsao donataha ine Bristibar salo, a·dokni Chief Minister parakataha.
Bristibar salo, 18-West Shillong Constituency-na dingtang dingtang project-rangko Lower Mawprem-ni Hindu Mission-o a·bachengate on·angengmiting somoio iako Chief Minister parakataha.
“Na·simang iako knana kusi ong·gen maina Gandhi Jayanti-ni salko manianio an·chingni Meghalaya a·doknaba JJM-ni kamrangko chu·sokatanio nambatgipa a·dokrangoni damsa ine a·songni President-ni jakchi upattiko on·angna sienga,” ine Chief Minister aganaha.
An·seng baljokaniko on·aoni Tourism-ona dingtang dingtang kamrango chu·sokgipa ong·ahani gimin batanggimin somoirango Meghalaya a·dokna dingtang dingtang award-rangko on·aha ineba Chief Minister, ia tom·anio parakataha.
“Da·o bilsi 10-ni gisepo Meghalaya a·dokkoba a·songo nambatsranggipa dam 10 a·dokrangoni damsa ong·atna gita chinga niksamsoani gnang kamko ka·enga aro dingtang dingtang kamrangko a·bachengate ka·anichi a·doko bang·en namroro silroroaniko ra·bana man·aha,” ineba ua aganaha.
Ia tom·anio a·dokni Chief Minister, jolni MLA Mohendro Rapsang aro gipin dilgiparang baksa Hindu Mission-ni mortuary van-ko a·bachengate on·angan baksana ia jolo LED Street Light aro CCTV-rangkoba a·bachengate on·angjolaha.
Ia project-rangko Chief Minister’s Special Development Fund-ni ning·o chame on·aha aro ia tom·anio a·dokni Chief Minister, Meghalaya Hindu Mission-chi chalaienggipa ma·gri pagrirangni noko dongenggipa bi·sarangkoba grongjolangaha.
