SHILLONG: Trinamool Congress (TMC)-ni MLA-rangko man·chape komibeoba sakbonga ba sakdok MLA-rang, National People’s Party (NPP)-o bakan napna sienga ine NPP-ni state president aro Meghalaya a·dokni Rajya Sabha MP WR Kharlukhi a·kangataha.
Da·o dipet ua Garo Hills-ona re·bae NPP-ko bilakbatatna kamrangko ka·engachim ine nikna man·a.
Kharlukhi-ni parakatani gitade, NPP-o napna sienggipa sakbonga ba sakdok MLA-rangara, TMC baksana dingtang dingtang political dolrangni MLA-rang ong·achim.
Ia MLA-rang, re·baenggipa Assembly election-na skang January jani skanggipa antio NPP-o napnaba gnang ineba Kharlukhi parakataha.
Garo Hills-o NPP-ko bilakbatatna gita rakbee kamrangko ka·enga ineba ua aganaha.
Da·o MLA ong·enggipa manderangoni bang·batanan party tikitko on·jawama ine sing·on, da·o dipet candidate-rangna tikitko on·ani giminba NPP chanchia dongkuja ine NPP-ni state president parakataha.
2018 bilsini Assembly election-o Congress dolni ja·man NPP dolan bang·bate seat-rangko chegipa dol ong·ahachim indiba ja·mano NPP-ni dilgiparang, dingtang dingtang political dolrang baksa bakrime MDA sorkariko rikskaahachim.
2018 bilsini Assembly election-na skang, Prestone Tynsong, Sniawbhalang Dhar aro gipin dilgiparang Congress dolko wate NPP-o napangani ja·man Meghalaya a·doko NPP bilakbatna a·bachengahachim ine nikna man·a
