SHILLONG: Jal Jeevan Mission (JJM)-ni ning·o census town-rangkoba chanchapna gita ma·mong sorkarini on·engahani gimin Meghalaya a·doko damsku census town-rangko chanchapataha aro uandaken da·o Meghalaya a·doko ia project-ni namgniko lak 6.3 nokdangrang man·gnok ine a·dokni PHE Minister Renikton Lyngdoh Tongkhar parakataha.
“Ia damsku census town-rangni DPR-koba chinga tarimanaha aro census town-rangkoba ministry chanchapna on·ahani gimin JJM-ni namgniko man·gipa nokdangrang lak 6.3-ona bariangaha,” ine tom·a matchotani ja·man PHE Minister aganaha.
PHE Department-ni Commissioner & Secretary aro Meghalaya a·doko JJM-ni Director ong·enggipa Syed Md A Razi-ni parakatani gitade, niamo pangchake Meghalaya a·dokko census town-ni gadang dongipa biaprangkosan chanchapna on·aiaha aro jillarangode da·o dipet ia project-ko on·kujaenga.
Meghalaya a·doko municipal area-rang bang·jani gimin ia project-ni namgniko man·batgen ine Tongkhar parakataha.
Shillong songjinmani wilwilao donggipa damsku census town-rangko ia project-o napatna gita proposal-ko ministry-na watatmanaha aro ia proposal-ko ma·mong sorkari ra·chakaha ineba PHE Minister parakataha.
Tongkhar-ni aganani gitade, ia JJM-ni ning·o Meghalaya a·dok gimikni ge 5,89,888 nokdangrangkosan nisan donahachim indiba da·o damsku census town-rangkoba ia project-o napatahani gimin namgniko man·enggipa nokdangrang lak 6.3-ona bariangaha.
Department-ni tom·e chanchirimgipani bidingo talataniko on·angengon, a·doko JJM-ni kamko dam 1400 songrangna baten matchotaha aro iana gong kror 1600-mangni gita koros ong·aha ine PHE Minister parakataha.
JJM-ni kamko December jani gisepon matchotatna nisanko donahachim indiba da·o dipet kamrang 40 percent-mangni gitasan matchotengkua ineba Tongkhar parakataha.
“Indake ong·genchimoba chinga man·a dipet December jani bon·angachibara kamko matchotatna jotton ka·enga. Da·o bangki dongenggipa jagittamara kam ka·ani somoi ong·ani gimin chinga ia somoirango kamrangko matchotatna rake kamko ka·gen,” ine Tongkhar aganaha.