TURA: Damra-oni Bajengdoba-ona dakbagipa ramako re·baenggipa 2023 bilsini May jao matchotate on·na gita ia ramako tarienggipa company, Budbar salo ku·rachakaniko on·angaha ine North Garo Hills a·jani NGO-rang parakataha.
Damra-oni Bajengdoba-ona dakbagipa ramako Badi Rai & Company dol tariengachim indiba ia ramako tarina a·bachengaoni da·onan kamrang matchotkujaengani gimin North Garo Hills a·jani dingtang dingtang NGO-rang, chong·motan GSMC, AAYF, ADE, ASWA, GSU, AYWO, FAF, AHAM aro uandakgipa dolrang Budbar salo, North Garo Hills a·jani District Administration baksa tom·e chanchirimangaha aro ia tom·anio ia ramako tarienggipa company-ni official-rangba bakko ra·angaha.
Ia ramako tarienggipa company, ru·uta salrangna skangan kamrangko dontongatahani a·sel da·o ramao a·kolrara dakaniko nikna man·engaha aro ian re·ruraenggipa manderangna kenchakna nangani ong·enga ine North Garo Hills a·jani NGO-rang, ia company-ni kosako jegalaniko mesokna gita walni somoio rama champengatna gitaba tik ka·angahachim.
Indake ong·engon, Budbar salo NGO-rang baksa tom·e chanchirimanganio, ia ramako re·baenggipa 2023 bilsini May jaon matchotatna gita ia company-ni official-rang ku·rachakaniko on·angaha indiba ia dongimin somoi gita rama tarianiko matchotjagenchimode North Garo Hills a·ja gimikon jingjengatanirangko dakanggen ine NGO-rang mikrakataniko on·angaha.
Damra-Bajengdoba ramako 2023 bilsini May jao matchotatna ku·rachaka
Date:
Share post:
