TURA: Re·anggipa October-ni 14 aro 15 tarikrango, A·chik Literature Society (ALS), NEHU Tura Campus-ni Garo Department baksa nangrime, Regional Writers’ Meet-ko salgnina, Tura Don Bosco College of Teachers Education-ni Seminar Hall-o ong·atangaha aro ia Writers Meet-ko skanggipa salo, Don Bosco College of Teachers Education-ni Principal, Dr (Fr) Zacharius George, mongsonggipa sokgipa ong·e bakko ra·angenba, a·bachengate on·angaha.
Ia Regional Writers Meet-ko a·bachengate on·anganio Don Bosco College of Teachers Education-ni Principal Fr George, jinmana aganprakangengon, iandakgipa writers meet ba segipa jotgiparangni gronggrikani program-ko ong·atengani gimin A·chik Literature Society-ko mittelpilangenba, iandakgipa program-rangko ong·ataniara segipa jotgiparangna an·tangtangni segiminrangko poraie u·iatna cholko on·ani gita ong·e da·ororoni chadamberangkoba sea jotanio gisik nangchina didiani gita ong·gen ine parakangaha.
Ia program-ko ong·atanio ALS-ni president Prof Caroline R Marak-ba jinmana aganprakengon, batanggimin salrangoba A·chik Literature Society-ni gita regional writers workshop-ko August 26 aro 27 tarikrango Mendipathar College-o, September-ni 8-oni 10 tarikona Tura Don Bosco College-o aro September-ni 29 tariko Durama College-o ong·atangaha aro ia program-rangko ong·atanichi bang·en chadamberangko sea jotanio gisik nangchina didina man·aha ine parakangaha.
Ia Writers Meet-ni skanggipa salo, sak 150-na baten, sea jotanio gisik nanggipa manderang bakko ra·angenba, an·tangtangni segimin poedorangko jinmana poraiatna gita cholrangko man·aha.
Gnigipa saloba sea jotanio gisik nanggipa manderang bang·en bakko ra·angtokaha aro ia gnigipa salo, ku·akmao seanirang, kan·dikgipa golporang, dakmesokanirang aro poedorangkoba poraina cholko man·tokaha.
Ia salgnina ong·atanggipa regional writers meet-o bak ra·e an·tangtangni segimin poedo aro golporangko poraiatgipa manderangoni mitamranga, poedo aro ki·tap serakgipa Kroshnil D Sangma, gitcham MCS Officer Mirthnarch K Marak, ALS-ni secretary Dr Crystal Cornelious D Marak, sakgipin poedo serakgipa Dr Colnat B Marak, aro gipinrang ong·a.
Ia salgnina ong·atanggipa regional writers’ meet-o Tura Don Bosco College, Don Bosco Higher Secondary Section, NEHU Tura Campus, ICFAI University, Tura Government College, Durama College, Williamnagar-o donggipa Loyola College aro gipin college-rango poraigipa chatro chatrirangba bakko ra·angtokaha.
Bon·kamgipa salo, ia writers meet-o bak ra·anggipa pilaknan certificate-rangko suale on·angaha.
