SHILLONG: East Khasi Hills a·jao Aspire Meghalaya District Talents Events 2022-o chegiparangna Budbar salo, a·dokni Chief Minister Conrad K Sangma, Shillong songjinmani U Soso Tham Auditorim-o mande ra·pilskaaniko dakangaha.
Ia Aspire Meghalaya-ni District Talents Events 2022-ko October aro November jagnina, a·dokni dingtang dingtang a·jarango ong·atengachim aro ia susaaniko re·anggipa October 6 tariko a·bachengatahachim.
East Khasi Hills a·jaoba ia susaani program-ko Budbar salo, Shillong songjinmani U Soso Tham Auditorium-o ong·atangaha aro ia susaanio dambonga campus-rangoni sak 26 chadamberang, an·tangtangni changa sapanirang baksa susaangaha.
East Khasi Hills a·jao ia susaanio bak ra·gipa sak 26 chadamberangoni nambatgipa sakgittam chadamberang seokako man·aha aro uamangara, skanggipa, chroksusaanio bakko ra·gipa Shillong St Mary’s Higher Secondary School-ni Afshana Nongkynrih, gnigipao doka dam·anio bakko ra·gipa Pynursla St Anthony’s Higher Secondary School-ni Elanstar Mawiong aro gittamgipao git ring·susaanio bakko ra·gipa Shillong Commerce College-ni Ashish Paul ong·a.
Ia program-ko ong·atanio East Khasi Hills a·jao donggipa Aspire Meghalaya-ni dam 103 campus-rangna, Meghalaya Youth Survey 2022 aro Soft Skills Training program-rango bakko ra·ahani gimin dingtangmancha, a·dokni Chief Minister Conrad K Sangma-ni jakchi mande ra·pilskaanikoba dakangjolaha.
