SHILLONG: Batanggimin bilsibri atani gisepo NPP-chi dilenggipa MDA sorkarini kamrangko a·dokni manderang nikmanahani gimin re·baenggipa 2023 bilsini Assembly election-o a·dokni manderangsa an·tangtangni raiko on·gen ine Budbar salo, People’s Democratic Front (PDF) dolni president Banteidor Lyngdoh parakataha.
Iani bidingo kobor ra·timgipa manderang baksa agangrikengon, da·o dipet MDA sorkario, PDF-ni jako ra·enggipa department-rangode maming golmalrang dongkujaenga aro iako ua jinmana talate on·na man·gen ine Lyngdoh parakataha.
“Angni jako ra·enggipa department damgniniko manderang namgnirangko man·china gita anga rakbee kamrangko ka·aha,” ine a·dokni Agriculture aro Sports & Youth Affairs Minister ong·enggipa Banteidor Lyngdoh parakataha.
Da·o dipet Conrad Sangma-chi dilenggipa Cabinet-o PDF-ni sakgipin minister ong·enggipa mandeara Hamletson Dohling ong·achim aro ua Community & Rural Development (C&RD) baksana Information & Technology department-rangko jako ra·skaengachim.
Indake ong·engon, MDA sorkarini kosako tangka paisarangko jakkalsreta ine matnanganirangara sorkariko dilenggipa political dolni kosakosa ong·na nanga ineba PDF-ni president parakataha.
Sorkariko rikanio kim·kim ong·china aro dingtang dingtang namroro silroroani kamrangko ra·gatanio maming champenganirang dongjana gitasa MDA sorkarina PDF, chu·gimik term gita bakrimaniko on·aha ineba Lyngdoh parakataha.
UDP dolni a·kangani gita PDF gita dakgipa chonchongipa dolrangkode a·dokni manderang jegalgenma ine sing·on, indita bilsirangna manderangni nangnikanirangko chu·sokate on·na man·jahani gimin a·dokni manderang, dal·dalgipa political dolrangkoba jegalna man·skaaigen ine PDF-ni president parakataha.
“Ia chango chinga bang·bate seat-rangko chegen ine anga ka·dongenga. Election-ni ja·manosa manderang sano ka·donganiko mesoka, ukode an·ching ma·sina man·aigen,” ine Lyngdoh aganaha.
