SHILLONG: Re·baenggipa 2023 bilsini Assembly election-na National People’s Party (NPP)-ni tikitko man·jagenchimode Bharatiya Janata Party (BJP)-oni susaskanaba gnang ine manderangni gisepo chanchichipanirang ong·katengon, ua maming dakeba BJP-o napjawa ine Phulbari-ni NPP MLA SG Esmatur Mominin parakatskaaha.
Phulbari-ni MLA Mominin-ko man·chape sakbri MLA-rang, NPP-ni tikitko man·jagenchimode BJP-o napangskanaba gnang ine songbadrango seatani ja·man, iandake chanchichipe agananiko Phulbari-ni MLA jegalataha.
“Anga NPP-ni dilgipaan ong·engkua aro maming dakeba BJP-o napangani katta dongja,” ine Mominin parakataha.
Indake ong·genchimoba, re·baenggipa 2023 bilsini Assembly election-o una NPP-ni tikitko on·jagenchimode Phulbari constituency-o an·tangna kam ka·enggipa manderang baksa chanchirimchenge nanga gita ja·kuko de·anggen ine Mominin talataniko on·angskaaha.
Mominin-ni parakatani gitade, dingtang dingtang dolni dilgiparang uko an·tangtangni dolo napchina didiengachim.
