SHILLONG: Re·baenggipa 2023 bilsini Assembly election-o Meghalaya a·dokni Bharatiya Janata Party (BJP) dol, bilakbee susana gita tarisamsoengahaon, kamrangko ka·anio gipin dolrangni BJP-ni kosako ong·gija dake kam ka·aniko champengna gita BJP-ni social media team kamrangko ka·dilanggen ine Sukrobar salo, BJP Meghalaya-ni state president Ernest Mawrie parakataha.
Mawrie-ni parakatani gitade, Meghalaya a·doko namroro silroroaniko ra·bana kamrangko ka·engon, BJP-ni kosako ong·gija dake matnanggipa aro biming man·atgipa dolrangko warachakna gita a·doko BJP-ni social media team-ko bikotaha.
“Ia social media team-o sak 12 membor-rang, sak 12 district convenor-rang aro dol 55 constituency monitoring team-rang donga,” ine BJP-ni state president talataniko on·angaha.
Mawrie-ni parakatani gitade, adita salrangna skangsan, badiaba dolni manderang, 2018 bilsioni noksako taridapenba, BJP-ni kosako tol·e biming man·atna aro manderangko mitchiatna jotton ka·ahachim.
“Chinga ia election-o namroro silroroaniko nisan donesa aro chadamberang baksana dingtang dingtang songni manderangni man·enggipa neng·nikanirangko chel·chakna gitasa ia election-o susaenga,” ine Mawrie parakataha.
Ia chang election-o BJP-ni kosako tol·e biming man·atgiparangko rim·a man·genchimode rakgipa ja·kurangko de·gen ine mikrakataniko on·angengon, saoba BJP-ni bimingo ong·gija dake jangbingbangatanirangko on·enga ine rim·a man·genchimode uandakgipa manderangni kosako niamo pangchake nanga gita ja·kurangko de·anggen ine BJP-ni state president parakataha.
A·dokni manderangna namgni ong·na gita ma·mong sorkarini ra·gate on·gipa dingtang dingtang scheme-rangni bidingo aro ia scheme-rangko ra·gate ka·enggipa central agency-rangni bidingo social media campaign-ko ong·atanggen ineba Mawrie parakataha.
