NEW DELHI: Adita salrangna skang, Meghalaya a·dokni skotong Shillong songjinmao, Federation of Khasi Jaintia & Garo People (FKJGP) dolni re·jomaniko ong·atanio dosgri manderangko skatang doka sata dakani gimin Bristibar salo, Vishwa Hindu Parishad (VHP) dolni gitaba jegalataha aro a·doko Tribal aro Tribal ong·gijagipa manderangni gisepo meli nangrimaniko rakkiangchina gita ma·mong aro a·dok sorkarirangko didiataha.
“Meghalaya a·doko chadamberangna kamrangko ka·e cha·na cholrangko on·jaenga ine sorkarini kosako jegale FKJGP dolni re·jomaniko ong·atanio skatang dake dosgri manderangko doka sata dakaniara, Meghalaya sorkari ba ma·mong sorkarinasan ong·aigija a·song gimiknan jajrengna nanganiko ra·baaha,” ine VHP-ni central general secretary Milind Parande parakataha.
A·doko songdongenggipa manderangna nanga gita chel·chakanirangko on·china aro sorkariko jegale re·jomaniko ong·atanio dosgri manderangko chadrapgipa manderangni kosako rakgipa ja·kurangko de·china gitaba ua dabiangaha.
Iandake so·sojengjeng ong·atna gita dakchakanirangko on·enggipa political dolrangni kosako rakgipa ja·kurangko de·china gitaba VHP-ni central general secretary didiataha.
Parande-ni parakatani gitade, FKJGP-ni re·jomaniko ong·atanio dosgri manderangko skatang dake doka satanirangko dakan baksana a·songni kosako kragijagipa kattarangko chrik a·bokanirangara badiaba dolrangni jak dongpaaniko mesokaniba ong·enga.
“Chingni chanchiani gitade, opposition dolrangan, iandake so·sojengjeng ong·atanirangko dakchina mitam chadamberangko didienga,” ine VHP-ni dilgipa parakataha.
Meghalaya a·doko tom·tome janggi tangenggipa manderangni kosako iandake kenjagokataniko ra·baahani gimin ua FKJGP-ni president Dundee Khongsit-koba jegalataha.
Indake ong·engon, ia a·sel ong·anio jak donggipa manderangni kosako Meghalaya sorkari aro ma·mong sorkari nanga gita ja·kurangko de·gen aro a·doko songdongenggipa Tribal aro Tribal ong·gijagipa manderangna tom·tomao janggi tangna cholko on·gen ineba VHP-ni general secretary, an·tangni ka·dongchakenganiko parakataha.
