TURA: Re·anggipa November-ni 2 aro 3 tarikrango, South Garo Hills a·jani Chokpot-o donggipa Krishi Vigyan Kendra (KVK)-ni gita, ong·telaigipa a·salrangchi gama ge·ani bidingo, game ge·e cha·giparangna skie on·na gita training program-ko Chokpot-o ong·atangaha.
Ia program-ko ong·atanio Tura College of Community Science-ni Dean, Dr Jyoti V Vastrad, mongsonggipa sokgipa ong·e bakko ra·angaha aro program-o skie ra·giparangna aganprakangengon, ong·telaigipa a·salrangchi gama ge·anirangko dakchina, game ge·e cha·giparangko didiangaha.
Ia program-ko ong·atanio South Garo Hills NABARD-ni DDM Khelchandra Chongtham-ba dongpae, game ge·e cha·giparangna aganprakengon, gama ge·anirangko dakanio altue jakkalna man·gipa kolrangko jakkale, janggi tangani gadangko tang·doatchina gita didiangaha.
Ia training program-ko ong·atanio agan-skie on·anggipa manderangara, South Garo Hills KVK-ni Head aro Senior Scientist Dr Athokpam Haribhushan, SMS (Agronomy) Rike Chelchak A Sangma, SMS (Plant Protection) Dr Tanya R Marak, SMS (Livestock Production) Rupam Bhattacharya, SMS (Horticulture) Basu Langpoklakpam aro gipinrang ong·a.
