TURA: Meghalaya a·doko NPP-chi dilenggipa MDA sorkarini kamrangko ka·sretengani a·sel a·doko namroro silroroani pal namjabatroroaniko nikna man·enga ine Sombar salo, Opposition Trinamool Congress (TMC)-ni dilgipa Mukul Sangma parakatenba, a·doko lekka porani kamrangna gisiko nangjabatengani gimin an·tangni suk ong·gijaniko parakataha.
“Anga saksa skigiparangni degipa ong·e, skigiparangni man·gnina dabiengmiting somoio gol·dikrangchi doka sataniko nike namen ka·a be·a. Skigiparang bang·pagija dormahanan indakpile duko chake kamko ka·tokenga indiba ia sorkari, skigiparangni kosako kragija dake mesokskaenga. Skigipani degipa ong·e skigipani neng·nikanirangko anga namen ma·sichaka indiba sorkari skigiparangni kosako dokkol ka·na jotton ka·skaenga. Indide iara uamangni a·kangani gita lekka porana gisik on·e kam ka·aniko mesokengama?” ine Sangma sing·doangaha.
Bilsi 20 batpile uni a·dokna kam ka·anio ua changsaba iandake skigiparangni kosako doka sataniko aro chadamberangni kamrangna ka·oksianiko nika dongkujachim ineba TMC-ni dilgipa parakataha.
“1997 bilsi dipetan angaba a·dokna aro a·dokni manderangna dangdike on·paengaha indiba changsaba skigiparangko gol·dikrangchi doka sataniko aro chadamberangni janggi tangani chol dongjae skatang dakanirangko nika dongkujachim. Da·alo iandakgipa obostarang an·chingni a·doko ong·engaha. A·doko niam retirangko rakkijaenga ine anga aganjaenga indiba ia sorkari, a·dokni manderangna maming simsak nirokanirang dongjaenga,” ine Sangma parakataha.
Sombar salo, TMC-ni tom·bimonganiko Tikrikilla songo ong·atanio ua ia kattarangko aganaha.
Ia tom·bimonganio West Garo Hills a·jao TMC-ni damgipin office-koba kulie on·angjolahachim.
Ia sorkarini simsakjaengani a·sel a·dokni ritchani ritcha skulrango skigipa gri ong·e poraienggipa bi·sarang a·gilsakni seng·aniko skie ra·na man·jaenga ineba Opposition dolni dilgipa parakataha.
“Bang·a skulrangon skigiparang dongjani gimin anga changni chang Assembly-o sorkariko mikrakatahachim aro poraienggipa bi·sarangni namgnina chanchie ja·kurangko de·china aganahachim. Ia sorkari bang·a kamrangon chu·sokgipa ong·jaha indiba namjabatsranggipade lekka porako galchipanian ong·enga,” ine Sangma aganaha.
Ia tom·bimonganiko ong·atanio dongpae bakko ra·anggipa TMC-ni gipin dilgiparangara, Mahendraganj-ni MLA Dikkanchi D Shira, Chokpot-ni MLA Lazarus M Sangma, dingtang dingtang MDC-rang aro gipinrang ong·achim.
