TURA: Adita salrangna skang, Bangladesh a·songni mande saksako Purakhasia-o donggipa Puran Bazar-ni manderang jinma rim·enba ja·mano police-rangna pakwate on·ataha.
Purakhasia outpost-oni koborko on·atani gitade, Bangladesh-ni mande saksako Puran Bazar-ni manderang rim·aha ine koborko man·soani ja·man outpost-ni in-charge aro sipairang, ua biapona re·angon Puran Bazar-o Bangladesh a·songni Nosandi a·jao donggipa Telia songni Ushav Miah minggipa mandeko rim·aha ine nikeaha.
Ia mandeko songni manderang pakwate on·atani ja·man, Purakhasia outpost-ona rim·ange sing·sandion, ia mande Indo-Bangla simao re·roroe dongengmiting somoio maibakae India a·song ning·chipakna re·bamanaha ine police-rangna ku·rachakaha.
Ia mandeko porikka ra·e nina gita Purakhasia PHC-ona wataton, PHC-o doctor dongjani gimin ja·mano Dalu CHC-ona watatskaaha aro Dalu CHC-o ia mandeko porikka ra·e nion, uo maming mata bu·ani aro chuni bibarangko man·jaha ine CHC-ni doctor-rang parakataha.
Ia mandeko da·o Purakhasia outpost-ni thana-o donenga aro Dalu police station-ni officer-in-charge-na ineba outpost-ni in-charge parakataha.
