SHILLONG: 2012 bilsini Presidential election-o Lok Sabha-ni gitcham Speaker PA Sangma sagi, Trinamool Congress (TMC)-onisa susaahachim ine adita salrangna skang, Tura-ona re·baani somoio All India Trinamool Congress (AITC)-ni national general secretary Abhishek Banerjee-ni agananiko National People’s Party (NPP)-ni state president WR Kharlukhi jegalataha.
“Ua manderangko tol·engama an·tangkon tol·enga? Presidential election-o PA Sangma sagini susaanio TMC una chakpaaniko on·jahachim aro iako ua name ma·sie ra·na nanga,” ine Meghalaya a·dokni Rajya Sabha MP aro NPP-ni state president Kharlukhi parakataha.
TMC-ko Bengal a·dokni party ine matnanganirangko jegalatenba, PA Sangma sagini a·songo president-ni kamna susaani somoio uaba TMC-ni candidate ong·esa susaahachim aro iako pilakan ma·sina nanga ine Sukrobar salo AITC-ni national general secretary Banerjee aganahachim.
Uni iandake a·kanganiko jegalatskaengon, presidential election-o PA Sangma sagina BJP dolsa chakpaaniko on·aha aro West Bengal a·dokode gimik sak 278 MLA-rangoni sak 275 MLA-rangde Pranab Mukherjee-nasa pu·onahachim ine Kharlukhi parakataha.
“PA Sangma gita dakgipa saksa politician-ni gimin ua indakesa ma·sienga ong·ode manderang maiko uoniko aro uni doloniko ka·dongkuna man·gen? Ian uni Meghalaya a·dokni gimin ma·sisranggijaniko mesokaniba ong·a,” ine NPP-ni state president parakataha.
AITC-ni national general secretary aro MP Abhishek Banerjee-ni salgnina Garo Hills-ona re·baanio Sukrobar salo dingtangmancha TMC-ni bilko mesokna gita Tura-o re·jomaniko aro New Tura kal·chakramo jinma tom·bimonganikoba ong·atangahachim.
