SHILLONG: National People’s Party (NPP)-chi dilenggipa Meghalaya Democratic Alliance (MDA) sorkarini batanggimin bilsi bongana sorkariko dilsretani aro tangka paisarangko jakkalsretaniko ra·e re·baenggipa 2023 bilsini Assembly election-o bilake susagen ine Sombar salo, Congress dolni dilgiparang parakataha.
“NPP-chi dilenggipa MDA sorkarini kamrango a·dokni bang·a manderangan suk ong·tokjaengaha. Ia bilsi bongani gisepo MDA sorkari, MeECL aro dingtang dingtang department-rango bang·en tangka paisarangko jakkalsretaha aro iana manderang ia sorkariko namniktokjaha,” ine Congress dolni dilgiparang parakataha.
Meghalaya a·doko Congress dolna pu·ongiparang bang·en dongkuenga ine janapatengon, da·omangba Congress dolo Vincent Pala, Ronnie V Lyngdoh, PN Syiem aro uandakgipa dingtang dingtang dilgiparang dongkuengani gimin namnamgipa candidate-rangko susaatgenchimode election-o name dakna man·aigen ine Congress dolni dilgiparang parakataha.
Congress dolni ning·o dilgiparang dongjaha ine agananiko jegalatengon, manderangsa dilgipakode seokronga aro batanggimin bilsirango Congress dol, bang·en dilgiparangko ong·katahani gimin mikkangchiba namnamgipa dilgiparangko ong·katatna man·kuaigen ine Congress dolni dilgiparang parakataha.
Election-na campaign ka·ani somoirango, Shashi Tharoor, Kanhaiya Kumar, Priyanka Gandhi aro uandakgipa dilgiparangko Meghalaya a·dokona aro mongsongbate Garo Hills-ona rimbagen ineba Congress dilgiparang parakataha.