SHILLONG: Re·baenggipa 2023 bilsini Assembly election-o National People’s Party (NPP) aro Congress dolni gisepo susaani ong·batgen ine Budbar salo, Nongstoin-ni MLA aro NPP-ni dilgipa Macmillan Byrsat a·kangataha.
2018 bilsini Assembly election-o Byrsat an·tangba, Congress dolni candidate aro da·o MDC ong·enggipa Gabriel Wahlang baksa susae Nongstoin MLA-na seokako man·ahachim.
Byrsat-ni parakatani gitade, ua saksa Hima Nongstoin Lyngdoh-ni myntri ong·e Hoping Stone Lyngdoh gitan jolni manderangna dangdike on·aha maina Hoping Stone Lyngdoh sagiba Hima Mawiiang-ni Basan ong·e, manderangna dangdike on·angahachim.
“Anga pangnan manderangni namgninasa kamko ka·engani gimin manderang ango ka·dongchaktokenga aro ia chang election-de anga skang changona bate nambate dakna ka·dongenga,” ine Nongstoin MLA aganaha.
Election-na da·o jagnisan dongaiahaoba ua manderangni bakrimanichi chegipa ong·taigen ineba Byrsat parakataha.
Batanggimin bilsibri atani gisepo uni kamrangan uko ia changoba chegipa ong·atna dakchakgen ineba Byrsat parakataha.
