TURA: Gitcham Congress sorkarini Meghalaya a·dokni manderangna ka·e donanggipa kamrangko National People’s Party (NPP)-chi dilenggipa Meghalaya Democratic Alliance (MDA) sorkari nisigaltokaha ine Mongolbar salo, Trinamool Congress (TMC) dolni tom·bimonganiko South Garo Hills a·jani Rongara-Siju constituency-o ong·atanio Opposition TMC-ni dilgipa Mukul Sangma parakataha.
“Angni chief minister ong·engmiting somoio bang·a scheme-rangkon anga chu·sokate on·na man·aha aro ia scheme-rang a·dokni manderangna bang·en namgni ong·ahachim indiba ia scheme-rangko da·o NPP-chi dilenggipa MDA sorkari, rusie galtokaha,” ine Sangma parakataha.
Gitcham Congress sorkarini kamrangni gimin janapangkuengon, ua somoio manderangni neng·nikanirangko namatna gita a·dokni tangka paisarang chu·ongjaengon ua special central assistance-ko man·bae on·aha aro mikkang chasongni manderangna bang·a scheme-rangkon a·bachengate on·ahachim ine TMC-ni dilgipa aganaha.
“Asian Development Bank-ni dakchakanichi chinga bang·a skulrangko kulie on·ahachim indiba ia skulrangko MDA sorkari bon·attokaha,” ine Sangma aganaha.
Gitcham Congress sorkarini somoio rama jal·langrangko tarie on·ani gimin janapatengon, “NH-62, NH-51 aro Shillong-Dawki (NH-40) ramako tarina anga Japan International Cooperation Agency (JICA) baksa songgigrikanio soi ka·aha. Nongstoin rama aro Shillong-Dawki ramarang pilakan angni somoio a·bachengatgipa ramarangsa ong·a,” ine Sangma a·kangataha.
A·dokni tangka paisarang gimaengani giminba ua Conrad Sangma-chi dilenggipa MDA sorkariko sing·doangaha.
“District council-o kam ka·giparangna tangka paisarangko on·na man·jaengani a·sel kam ka·giparang indita neng·skime janggi tangna nangtokenga. Tangka paisarangko dakchake on·na chief minister ku·rachakahaoba ia neng·nikaniko namatchipna man·jaenga. Indide tangka paisarangara bachisa re·angenga?” ine Opposition TMC-ni dilgipa sing·doataha.
Ia tom·bimonganiko ong·atanio dongpae bakko ra·anggipa gipin manderangara, Chokpot-ni TMC MLA Lazarus M Sangma, Meghalaya TMC State Women’s-ni president Selma D Shira, Kharkutta-ni TMC MDC Cherak W Momin, Williamnagar-ni TMC MLA Alphonsush R Marak, Songsak MDC Lahitson M Sangma, Rongrong MDC Rinaldo K Sangma, Amongpara MDC Nehru D Sangma, Balachanda MDC Agassi R Marak aro gipinrang ong·a.
