SHILLONG: Ma·mong sorkarini ra·gatgipa Citizenship (Amendment) Act (CAA) 2019-ko jegale mesokangkuna gita December-ni 11 tariko, salgro salaramni pilak damsni a·dokrangon nisan gisimko songna gita tik ka·angaha ine Sukrobar salo, North East Students Organisation (NESO) parakataha.
NESO-ni chairman Samuel B Jyrwa-ni parakatani gitade, CAA-ko ma·mong sorkari, 2019 bilsini December-ni 11 tariko ra·gatahani gimin ia salko salgro salaramni pilak a·dokrangon ‘andalgipa sal’ ine pangnan gisik ra·kamgen.
“Uni gimin ia salko ‘andalgipa sal’ ine ra·angkuna gita salgro salaramni damsni a·dokrango donggipa pilak mongsonggipa biaprangon nisan gisimko songdona NESO tik ka·aha,” ine Jyrwa parakataha.
CAA 2019-ko ra·gatna skang, salgro salaram a·dokrango songdongenggipa manderang rakbee jegaltokahaoba, manderangni jegalaniko knachakgija ia ka·namgijagipa niamko 2019 bilsini December 11 tariko Rajya Sabha-o ma·mong sorkari pass ka·aha ineba NESO-ni chairman parakataha.
“Uni gimin December-ni 11 tariko an·ching pilakan nisan gisimko songe ia CAA 2019-ko raken jegala ine ma·mong sorkarina mesokangkuna. Ian salgro salaram a·dokrango songdongenggipa manderangko ma·mong sorkarini mikchepaniko jegalani chinba ong·gen,” ine Jyrwa aganaha.
Ia jegalanio bakrimaniko mesokchina gitaba NESO-ni dilgiparang, salgro salaramni pilak a·dokrango songdongenggipa manderangko didiataha.
