SHILLONG: Meghalaya sorkarini FOCUS aro FOCUS plus program-rangara, ‘politics’ kal·ani program-rangsa ong·aia ine Bristibar salo, National People’s Party (NPP)-chi dilenggipa Meghalaya Democratic Alliance (MDA)-o bak ong·paenggipa United Democratic Party (UDP) matnangataha.
“Ia program-ara da·o ong·na sienggipa election-na vote-rangko brena ra·gatgipa program-san ong·aia,” ine UDP-ni working president Paul Lyngdoh parakataha.
FOCUS program-rangko jillarangko ra·gataniara niamrangko pe·ani gita ong·enga ineba Lyngdoh matnangataha.
Lyngdoh-ni aganani gitade, ia scheme-ara songadam nokadamrangna miksonge ra·gatgipa program-sa ong·achim aro ia scheme-ara 2011 bilsio game ge·e cha·giparangna a·bachengatgipa program-san ong·aiachim.
Ia program-ko West Shillong constituency-o Chief Minister Conrad K Sangma-ni mikkango a·bachengatahachim ineba ua aganaha.
“Sorkari program-rangko maikai badiaba political dolni tom·anirangko parakna man·a? Game ge·e cha·enggipa manderangna ra·gatgipa scheme-ko, West Shillong constituency-o NPP-ni office bearer-rangko rimchaksona tom·aniko ong·ataniosa jinmana parakataha,” ine UDP-ni working president parakataha.
Iandake niamrangko pe·aniara mikkangchi ia scheme-ni kamrangko ka·anio neng·nikanirangko chagrongnaba gnang ineba ua aganaha.
“West Shillong constituency-o gama ge·ani a·arang dongjani gimin game ge·e cha·giparangni bimingrangko tarianio neng·nikanirang ong·katgen. Ia niam pe·aniko gital sorkari nipiltaina nangchongmotenga,” ine Lyngdoh aganaha.
Da·o gital sorkari, tangkarangko on·pilchina gita manderangko agangenchimode mai dakgen ineba ua sing·doataha.
FOCUS program-rangko Shillong-o ra·gatengani gimin apsan daken, UDP-ni general secretary Jemino Mawthoh-ba sing·doataha.
“Game ge·e cha·enggiparangn gong 5000 tangkarangko on·anikode anga jegalenga ong·ja indiba Nongthymmai, Malki, Laitumkhrah, Jaiaw aro Mawprem gita dakgipa constituency-rango game ge·e cha·giparang dongama? Ia scheme-ara kangal cholgrirangnasa ong·enga ong·ode urban Shillong-o bani a·ao gamna ge·na biap donga?” ine Mawthoh sing·doataha.
Iani bidingo talataniko on·china gitaba ua a·dokni chief minister-o dabiangaha.
