SHILLONG: Sorkariko rikpiltaina man·na gitasa National People’s Party (NPP) dol, gipin dolrangni MLA-rangko rime katna jotton ka·enga ine Meghalaya a·dokni Trinamool Congress (TMC) matnangataha.
“Chingni MLA saksako NPP rime katenba, uan uamangni official candidate ong·gen ine parakataha indiba chinga iani bidingo Tikrikilla-ni manderang baksa agan-chanchirimna nangengkua,” ine Opposition TMC-ni Chief Whip George B Lyngdoh parakataha.
TMC-ni MLA Jimmy Sangma-ko re·baenggipa election-o Tikrikilla constituency-oni NPP tikitchi susaatgen ine adita salrangna skangsan, NPP-ni national president aro a·dokni Chief Minister Conrad K Sangma parakatahachim.
Indake ong·genchimoba da·o dipet Jimmy Sangma-oni TMC dolna iani bidingo maming u·iata dongkuja ine TMC-ni dilgipa George B Lyngdoh parakatskaaha.
“Iani bidingo da·o dipet chingna maming u·iata dongkujani gimin chinga chanchirima dongkuja. Ua gipin dolchi napangna nangnikenga ong·ode skanggipa doloni resign ka·chenge chingna u·iatna nangachim indiba da·o dipet ua chingna mamingkon u·iatkuja,” ine Lyngdoh parakataha.
An·tangtangni mitam MLA-rangko gimaatahani gimin NPP-ni dilgiparang, ta·raken gipin dolni MLA-rangko rime katskana jotton ka·enga ineba ua parakataha.
“Uamang tarigimin dilgiparangkosa rime katna jotton ka·enga aro ian uamangni ka·dongani gri ong·aniko mesokanisa ong·enga,” ine Lyngdoh aganaha.
Meghalaya a·doko TMC priprae bon·angengahama ine sing·on, dilgiparangde re·bae re·angpilaigen indiba a·dokni manderang TMC baksa bakrimode uan party-ni bilakgipa ong·aniko mesokani ong·enga ine TMC-ni dilgipa parakataha.
