SHILLONG: Meghalaya Sorkari, a·doknji songadam-nokadamrango janggi tanggipa manderangni obostarangko nambatatna gita kamrangko dingchike ka·engon, Chief Minister Conrad K Sangma mijaloba West Khasi Hills district-ni Shallang-oba gitalgipa C&RD Block-o kulie on·aha aro Shallang Division-o songdong-a·chaenggipa manderangni janggi tangani gadangko saldo-ra·dona gita tangka-paisarangko aroba jila-alanirangko suale on·aha.
Gitalgipa Shallang C&RD Block-ko songe on·ani somoio jinmana aganprakengon, “Anga ia gitalgipa Shallang Block-ko manderangna songe on·na gita kusi ong·bea, jeon ia gitalgipa block manderangna namgni ong·gnok. Uasan ong·aija, manderangni janggi tanganikoba namdapatna gita dakchakani ong·gen. Chingni sorkariko name rikaniko rakkienba manderangona sepangbatroroatengon, da·alo ching·a gitalgipaShallang C&RD Block-ko West Khasi Hills District-o kulie on·a” ine chief minister aganaha.
Chief Minister, ‘FOCUS+’ Farmer’s Welfare Programme-ni ning·o ge 1,594 nokdangrangna Gong lak 79.70 tangkarangko suale on·aha. Meghalaya a·doko game ge·e cha·giparangna aro jile aale cha·giparangna namgniko on·na gita ia ‘FOCUS+’ ko a·bachengataha. Ia ‘FOCUS’ (Farmers Collectivization for Upscaling Production and Marketing System), game sue cha·giparangni namgnina miksonge a·bachengatgipa dal·batsranggipa program ong·a. Focus aro Focus+, ia minggni scheme-rang, Meghalaya-o game sue cha·giparangna Gong 10,000 ka·e nokdangprakna dakchakaniko on·gen. Indake dol 14 Self-Help Groups (SHGs)-rangna Gong lak .39 tangkarangkoba sualataha.
Iarangna agreba, Rural Backyard Piggery Scheme, ‘PROGRESS’-ni ning·o mang 1600 wak bi·sarangko (bima mang 3 aro bipa mangprak ka·e) West Khasi Hills district-ni ge 400 nokdangrangna suale on·angaha. Kuroiler do·o bi·sarangkoba sak 100 manderangna suale on·aha. Manderangna dingtang dingtang jila-aalaniko dakna cholko on·enba manderangni janggi tangani gadangko tang·doatna gita ia ‘PROGRESS’ scheme-ni miksongani ong·a. Sak 10,000 jile aale cha·giparangna dakchakna uandake a·doko wak be·en aro do·orangko man·aniko bang·batatna ia scheme-ni miksongani ong·a.
