SHILLONG: National People’s Party (NPP)-o napchina gita una gong kror 5 tangkarangko on·achim ine re·anggipa Budbar salo, Mawkynrew-ni People’s Democratic Front (PDF) MLA aro a·dokni Cabinet Minister Banteidor Lyngdoh a·kangataha.
PDF MLA-ni iandake parakaniara re·baenggipa 2023 bilsini Assembly election-o tangka paisani bilake kam ka·na sienganiko mesokaniba ong·aha.
Mawkynrew-o ong·atanggipa jinma tom·bimonganio PDF Minister jinmana aganprakangengon, ua PDF dolon dongkuna miksongengani gimin aro 2023 bilsini Assembly election-o PDF dolonin susana miksongengani gimin NPP-ni una tangka on·aniko ua ra·chakjana tik ka·aha ine parakataha.
A·dokni gitcham chief minister Brington Buhai Lyngdoh sagiba apsan daken Congress dolo napchina on·aniko baditaba chang jegalahachim ineba Banteidor Lyngdoh parakataha.
“Uko (BB Lyngdoh) Congress dolo napchina baditaba chang didiahaoba ua bilsi 52-na kingking jolrangni party-on donge a·dokna dangdike on·aha. Mitchigipa sagalo jroana bate rongtalgipa chiring chibisiko jroanian nambata ine ua pangnan aganrongachim,” ine PDF MLA parakataha.
Election-na campaign ka·anian maiba manianirang gitasa ong·pilenga ineba Lyngdoh suk ong·gijaniko parakataha.
“Nongkrem constituency-o manderangna kombolrangko sualna gita truck garirango ra·anganiko anga nikaha,” ine ua aganaha.
Mawhati constituency-ko galchipgipa apsan manderangan da·o manderangna boksisrangko sualskaenga ineba Lyngdoh parakataha.
“Ian uamango manderangna dangdike on·na skani dongja ine mesokanisa ong·enga,” ine PDF MLA parakataha.
