ASHILLONG: Lachumiere-ni DIPR complex-o donggipa Shillong Press Club-ni gital nokko Bristibar salo, Meghalaya a·dokni Chief Minister Conrad K Sangma nokdonggae on·angaha.
Ia bilsio Shillong Press Club-ni bilsi 30 gapaniko maniengachim indiba ia Shillong Press Club-ko da·onan Lower Lachumiere-o donggipa nok parakosa ra·e chalaiengachim ine nikna man·a.
Shillong Press Club-ni bilsi 30 gapaniko maniani bak gita ia gital nokko nokdonggae on·angani somoio ia club-ni founding aro senior membor-rangnaba mande ra·pilskaaniko dakangjolaha.
Shillong Press Club-ni gita nokko nokdonggae on·anganio a·dokni Chief Minister jinmana aganprakatengon, ia Press club-ni gital nokko nokdonggaanichi a·doko kobor ra·timgipa manderangni kamrangko mangkimbatatna dakchakani ong·gnok ine parakataha.
Pangnan kakketko aro mikkang niteani gri koborrangko on·china gitaba ua Shillong Press Club-ni membor-rangko didiangaha.
